मुस्ताङको कोवाङमा चौंरीको आलो रगत पिउने मेला सुरू

चन्द्रश्वर बस्ताकोटी 

मुस्ताङ, ५ बैशाख ।

हिमाली जिल्ला मुस्ताङको कोवाङ गाविसस्थित– २ बोक्सीखोला भनिने घट्टे खोलामा सोमबार देखि चौरी गाईको आलो रगत पिउने मेला सुरू भएको छ ।
धौलागिरि चौरीपालन कृषक समुहको आयोजनामा सञ्चालन गरिएको मेलामा चौरी गाईको आलो रगत पिउन देशका विभिन्न भागबाट सर्वसाधारण कोवाङ आइपुगेको मेला आयोजक समितिका सचिब सकेन्द्र गौचनले जानकारी दिए । बिदैशबाट समेत चोरीको आलो रगत पिउनकै लागि केहि बिदेशिहरु समेत आएको उनले बताए ।
आफ्नो आयआर्जन बढाउन र दिर्घ रोगीहरुको लागि विगत लामो समयदेखि यस्तो मेलाको आयोजना गर्ने गरिएको छ । मेला १० दिनसम्म सञ्चालन हुने मेलामा आलो रगतका साथै याकको मासु, होटल रेष्टुरेष्ट समेत गरि एक गोठले ३ देखि ५ लाख सम्म आम्दानी गर्ने बताईको छ  ।
हिमाली क्षेत्रमा पाईने यार्सागुम्बा, जटामसी, पाँचऔले, निरमसी लगायत जडिवुटी खाएका चौरी र याकको आलो रगत पिएमा ग्यास्ट्रिक, यौन र्दुबलता र चिसोका कारण लाग्ने रोग निको हुनका साथै शारिरीक स्फुर्ती र अन्य रोगले समेत आक्रमण नगर्ने जनविश्वास रहेको छ ।
चौरीको आलो रगतमा हुन सक्ने जुकाका जिवाणुहरुलाई मार्न जिल्ला पशु सेवा कार्यालय मुस्ताङले जुकाको औषधी खुवाउने ब्यबस्था मिलाएको कार्यालयले जनाएको छ ।
चौरी र याकको घाँटीमा बिषेश प्रकारको चक्कुले प्वाल पारि आलो रगत निकाल्ने गरिन्छ । एक गिलास रगत पिएवापत बिरामीले १ सय रुपैया तिर्नुपर्छ । एक चौरी वा याकको शरिरबाट २० देखि २५ गिलास सम्म रगत निकाल्न सकिन्छ ।
सो क्षेत्रका १३ चौरी गोठका करिब ६ सय चौरी मध्ये ४ सय चौरीको आलो रगत निकाल्ने समुहका सचिब गौचनले बताए ।